Bila ibili arren, ez dugu Ilargi-harria diamante preziatua topatzerik izan. Zurrumurruen arabera, Indiara eraman dute berriro, lapurtua izan zen lekura, zirkulua itxiz. Eta hala ere, harribitxia topatu ez badugu ere, bideak merezi izan du, eta bilaketa ez da inola ere hutsala izan. Izan ere, bilaketa denak, utopien antzera, han daude, zeruertzean, eta akaso sekula bertara iritsiko ez bagara ere, bidean aurrera egiteko balio digute. Laino guztien azpitik eta sasi denen gainetik.
Eta sasiez ari garela, sasien artean topo egingo dugu hurrengo hitzorduan, Auschwitzeko kontzentrazio-esparru arantzatsuan. Horretarako, Primo Levi idazle italiarraren Hau gizon bat bada nobela irakurtzeko gonbita egiten dizuegu, datorren martxoaren 13an berriro elkartzeko eta sasikumeez hitz egiteko; hau da, gizakiaz hitz egiteko, geure buruaz, geure miseriez, geure izate gupidagabe eta ankerraz.
Liburua irakurtzeko bultzadatxoa behar baduzu, hona hemen komunikabide honetan bertan Aitor Aspuru kazetariak nobela eder honen gainean egindako iruzkina: http://www.aiaraldea.eus/proposamenak/literatura/hau-gizon-bat-bada
Hasi da orri artean bila ibiltzeko denbora. Eta martxoan, besterik ezean, konpainia ederra aurkituko duzu harrikada, orrialde eta ardoen artean Harri Orri Ar irakurle klubean. Ordura arte, irakurketa on!