Rafa Olabarria [1964-2018]

Nork ez zuen Rafa ezagutzen? Rafa Olabarria ezagutu nuenean euskara ikasten hasia zen. Nik euskararen irakaskuntzan izan nuen lehenengo taldea izan zen, eta Rafa talde horretan ibili zen. Gerora, Rafak euskara ikasteari utzi zion, urteak aurrera joan eta umeak Herriarenen pilota eskolan izena eman zuenean Rafa berriro egunerokoa bihurtu zen guretzat. Umeak, gazteak, mutilak, neskak, esku pilotan zebiltzanak eta palan zebiltzanak,... beti “Rafa! Rafa!” Zerbait eskatzeko. Rafa beti adi, zer egiten zuten eta zer ez zuten egiten, aholkua emateko beti prest.

Rafak Herriaren Pilota Elkartean historia egin du, zergatik? Mundu guztiak ezagutzen zuen Rafa eta Rafak mundu guztia ezagutzen zuen. Rafak bere ezagutzatik ekimen eta txapelketa asko jarri ditu martxan. Oraindik gogoan dut ume, gazte eta gurasoentzat Leitzara antolatutako txangoa; pilotariak agertu ez eta Iñaki Perurenarekin lotu zen Peru-Harri bisita genezan. Laudioko pilota eskola berpiztu izana neurri handi batean Rafari zor diogu. Rafaren lanak oinarri sendoak jarri zizkion, bai Herriaren Pilota Elkarteari, bai Herriaren Pilota Elkartearen inguruan mugitzen garen familioi. Denok familia handi bat osatzen dugu, Bartzelona, Baños, Leitza...

Rafa “el presi” joan da. Rafa laguna joan da. Orain, Herriaren Pilota Elkartea osatzen dugunoi dagokigu aurrera egitea. Hein batean umezurtz ibiliko garela badakigu, baina denon artean aurrera egin behar dugu eta Rafak utzitako ondarea mantentzeko eta handitzeko ahalegina egingo dugula ez zalantzarik izan, Rafak horrela nahi izango zuen eta!

Ez adiorik Rafa, gero arte!