Baliteke egun hauetan Gasteiztik, Iruñetik edo agian Bilbotik gertu gidatzea tokatu izana. Eta litekeena da traktore-karabanaren bat aurkitu izana, auto-ilararen bat jan izana, eta, oraingoan bakarrik izan bada ere lasaitasunez hartu izana, motorra amatatu zain egon zaren bitartean, eta baita lehen sektoreko langileei laguntzeko bozinakadaren bat ere jo izana.
Ba horietakoa izan bazara, mila esker intentzinoagatik, bihotzez, baina jakin ezazu ez garela gu izan traktoreenak. Eta guk diodanean, Agroekologiatik hurbil dagoen eredu produktibo bat praktikatzen dugun baserritarrei buruz hitz egin nahi dut.
Izan ere, lehen sektorearen barruan, gizartean bezala, bi eredu daude aurrez aurre. Kapitalaren eredua dago, traktore handiak, ekoizpen handiak eta monolaborantzak, merkatu globalera bideratuak. Eta baserritarren eredua dago, ekoizpen txikiak eta dibertsifikatuak, hurbileneko biztanleentzat.
Guk ere, baserritar eredukoek, mila aldarrikapen izan ditzakegu errepidera botatzeko; baina, jakina, ez da horietako bat animalien ongizateari buruzko legea indargabetzea; ez da horietako bat izango herbiziden erabilera % 50 murrizteko betebeharra ezabatzea; ez da horietako bat izango Ebroko ura zekale lurretara eramatea; eta, ez diegu gure bozeramaileei baimenik emango, esateko Eusko Jaurlaritzak eta aldundiek, gajoek, ahal duten guztia egiten dutela lehen sektorearen alde, baina konponbidea beraien eskumenetik kanpo dagoela, (reptilianoak errudun ziur asko, dena kontrolpean dute eta).
Gure arazoa eredu agroekologiko bat lantzen duten 10 baserritatik 8 ez iristea gutxieneko soldatara da, astean 52 orduko lanaldiekin, ekoizpenerako gehiegizko eskakizunek gero eta merkaturatze-bide gehiago zarratzen dizkigutela; edota elikagaiak eraldatzeko zentruen sarea desagerrarazi izana.
Gure arazoa, dirulaguntzen tranpan sartu diren ekoizleak produktua ekoizpen-kostuaren azpitik merkaturatzea da, edo elikagai-produkzioan eskatzen diren gutxienekoak betetzen ez dituzten herrialdeekin merkataritza libreko itunak sinatzea. Baina baita ere produktu horiek erosi eta kontsumitzen dituztenak.
Agian laster gu ere errepidera irtengo gara, ikusten duzue arrazoiak ez zaizkigula falta, baina ez da izango, ez Dani Desokuparekin, ezta Voxeko neska kaiku horrekin berez.
Eta orduan bai, aukera izango duzue, bidean txalotzeko, funtsezkoak izan ginen hiru hilabete haietan bezala, akordatzen? Baina kontuan izan, baserritarrak txalotu ostean ostera be supermerkaturako bidea hartzen badugu ez dugula aurrera egingo.