Ondo gogoan dut paper hauek lehenbizikoz eskuartera iritsi zirenean sentitu genuen zirrara. Lehen labekada atera zenetik milaka ale banatu dira, eta txiri-txiri, ehundik gora lagunen izerdiari esker, eskualdea euskalduntzen ari gara.
Zorionak hamabostean behin egunkari multzoak hartu eta ikastetxeetara, lantokietara, euskaltegietara eta edonora eramateko prestutasun osoa duzuen horiei. Zorionak zuen tarte libreetan askotariko gaiak orriotara ekartzen dituzuen zutabegile eta erredaktoreei.
Zorionak trenez, autobusez edo batek jakin nola, ale bat eraman, irakurri eta hurrengo geltokian uzten duzuen horiei. Zorionak eguneroko bizitza argazkien bidez, elkarrizketak eginez eta erantzunez, edota deialdi interesgarrien bidez erakusten diguzuenoi. Zorionak eta mila esker.
4 paper zati eta 16 orri soilik ikusten dira hemen, baina, egunerokoa Aiaraldean nolakoa den kontatzen digun ale honek herritar andanaren sostengua du atzean. Ezin ahaztu eskualdea handi, aberats, ameslari eta kementsu bilakatzen duen herritarra. Euskararen alde aletxoa uzteko prest dagoen kalekumeak, merkatariak eta jendarteak elikatzen du ingurunea. Bataren eta bestearen konpromiso txikiekin lurrok euskalduntzeko nahi adina gaitasun dugu.
Egunkaria horren isla baino ez da. Gure bizitzetan euskara sartu dugu. Paperean. Doan. Denok. Eskutik eskura.
Zeinek dio ametsak ez direla egi?