Joan den astelehenean txiolari eta pentsalari kritikoen ideiak izan dira poliziaren jo puntu.
Komunikazioaren aroan igerian gabiltza gaur. Sare sozialetatik azkar, erraz eta eraginkor zabaltzen diren mezu kontaezinak dira protagonista egunero- egunero. Eta ustez boteretsu diren Estatuak beldur dira, nola ez.
Beldur dira herritar xumeek adierazi ditzaketen ideiez. Beldur dira jendartean zabal daitezkeen uste, gertaera eta aldarrikapenez. Beldur dira euren gustukoak eta kontrolpekoak izango ez diren iritziez.
Jakin badakite sentimendu, ekintza eta errebolta askoren hazitegia dela sarea. Twitterren txioka aritzen den munduak, birtualetik baino errealetik duela gehiago.
Eta, batzuen zorionez, besteen zoritxarrez, 140 karakteretan hamaika injustiziaren aurkako garrasiak entzun daitezke. Ozen. Ziztu bizian. Bor-bor.
Delitua al da iritzia adieraztea?
1511 txio, 400 jarraitzaile, 310 profil jarraitzen ditu astelehen goizean atxilotu zuten Aiaraldea Komunikazio Leihoko gazteak. Jaietan, herrian, euskalgintzan zein mugimendu sozialetan kezka eta iniziatiba handiko laudiarra. Bera halako beste hainbeste izan zitezkeen terrore estrategiaren baitan ehizatuak.
Hegoak astindu eta askatasuna sentitzeraino… egin dezagun #txio!