Apirilaren 20tik aurrera, Xake Ikastaroa antolatu du Laudioko Xake Taldeak. Apirilaren 12ra arte izena emateko aukera izango da, eta ikastaro honetan interesa duen edozein maila eta adineko jendeak parte hartu dezake ere. Jon Zaballa taldekideak Aiaraldea Irratian jakinarazi duenez "gazteak animatzea" dute xede.
Larunbat goizetan ordu bat eta erdiz arituko dira Xakean ikasten eta jokatzen. Parte hartu nahi duenak laudioxake@gmail.com emailera idatziz edota 665 721 875 telefonora deituz egin dezake.
Jaiak eta Euskal Liga
Amurrio, Laudio eta Ugaoko gazteak biltzen dira talde honetan, eta urtero Amurrioko Jaietan ekintza berezia antolatzen dute Santi Gonzalezen laguntzaz. Bera, nazioartean ezaguna den jokalari euskal herritarra da, eta harekin aldibereko partidak jokatzeko aukera izaten da. 10 tablero prestatu, eta nahi duenak bere aurka aritzeko aukera izaten du.
Bestalde, aurtengo Arabako Txapelketa irabazi dutela-eta, datorren urtean Euskal Herri mailan arituko da Laudioko Xake taldea, eta 10 talderekin lehiatuko dira "Euskal Ligan".