Aiaraldeko bertsolariek ez dute zortea alde izan Arabako Bertsolari txapelketako aurrekanporaketetan. Izan ere, Iñaki Cabeza eta Julen Eizagirrek ez dute lehian aurrera egin. Ondorioz, lau izango dira txapelketan Aiaraldea ordezkatuko duten bertsolariak: Ainhoa Comas, Unai Mendibil, Izar Mendiguren eta Serapio Lopez.
Larunbatean jokatu ziren Saratxoko txokoan aurrekanporaketetako azkenengo bi saioak. Bazkalaurretik Julen Eizagirrek, Paula Amilburuk, Amaia Lasagak, Uxue Ruiz de Arkautek, Andoni Murgak eta Xabi Lopez de Santiagok kantatu zuten. Arratsaldean, aldiz, Oier Arbinak, Maria Izagak, Andoni Murgak, Iñaki Tenak, Unai Argotek eta Josu Olano aritu ziren kantuan.
Epaileen iritziz, Paula Amilburu, Maria Izaga, Iñaki Tena eta Xabi Lopez de Santiago izan ziren hobekien jardun zuten bertsolariak. Ondorioz, 2013an abiatuko den Arabako Bertsolari Txapelketan kantatzeko aukera izango dute.
Arabako Bertsozale Elkartearen aburuz, inoizko txapelketarik handiena izango da 2013koa, "52 bertsolarik eman dute izena". Aurrekanporaketa fasea irailean zehar burutu dute; sei saio izan dira eta 36 bertsolaritik hamabik egin dute aurrera. Horien artean daude Orlando Arreitunandia, Iker Pastor, Unai Bengoetxea, Beñat Oribe, Jagoba Apaolaza, Jon Ruiz de Pinedo, Maialen Saez de Okariz, Iker Olabarrieta, Paula Amilburu, Xabi Lopez de Santiago, Iñaki Tena eta Maria Izaga. Urtarriletik aurrera 2011ko txapelketan finalerdietara iritsi ziren bertsolariekin kanporaketak izango dituzte.