Haur eta gazteak udara begira daude dagoeneko. Aiarako Udalak, programa ezberdinak antolatu ditu aisialdira begira, eta gazteenek, udalekuez gozatzeko aukera izango dute, besteak beste. Ekainaren 24tik 28ra Orioko aterpetxean egingo duten egonaldirako azken leku libreak betetzeko izen emate epea ireki du bigarren aldiz. Maiatzaren 11rarte aukera izango da horretarako.
Izena emateko baldintzak
1996-2005 urte bitarteetan jaiotako gaztetxoei zuzenduta dago udalekua, eta baldintzetako bat Aiarako udalerrian erroldatuta egotea edota Etxaurren Ikastolako ikasleak izatea izango da.
Egonaldiak 95 euroko prezioa du eta bi epetan ordaintzeko aukera eman du Udalak. Era berean, izena ematean ordaindu beharreko gutxieneko 50 euroak, maiatzaren 11tik aurrera ez direla itzuliko ohartarazi dute. Aiarakoudala.com atarian edo Udaletxean bertan eman daiteke izena, formulario bat betez. Orria bete ostean, udaletxean bertan entrega daiteke (Arespalditzan eta Luiaondon), edota internet bidez: info@aiarakoudala.com helbidera igorriz. Orri honekin batera partaidearen osasun-txartelaren kopia bat ere aurkeztu beharko da.
Udalekuetarako haur eta gaztetxoen kopurua mugatua da eta izen emateko ordenaren arabera onartuko dira partaideak. Halaber, epealdia igarota, egonaldian parte hartzeko aukera duten ala ez baieztatuko du Udalak.