Udaleko Gobernu taldeak egindako zirriborroaren gainean emendakinak egin dituzte Laudioko bi alderdi politikoetako ordezkariek. Prentsa oharren bidez, jakinarazi dute bi taldeek, kultur taldeei, kirol taldeei edota gizarte eragileei ematen zaizkien dirulaguntzak, iazkoaren pare mantentzeko jarrera dutela.
Laudioko EAJ-k "enplegu eta prestakuntza sustatzeko programetarako laguntzak murriztuko direla eta, indarrean dauden programak indartzeko prestakuntza ikastaroak antolatzeko proposamena egin" dio Gobernu taldeari. Horrez gain, inbertsioei egindako ekarpenetan Areta-Gardea ardatza asfaltatzea eta Goikoplazako Etxebarri Baserria zaharberritzeko proiektua hasi eta berritze lanak burutzea daude.
Euskara eta komunikabideen alde
Bertako komunikabideetan euskararen erabilera sustatzeko laguntza zehatzak bideratzea ere eskatu dute Laudioko PNVtik. PSOEtik, berriz, komunikabide guztiei ematen zaizkien laguntzak "modu berean tratatzea" eskatu dute.
Atzoko egunez bidalitako oharrean PSE-EEko ordezkariek "San Roke Musika Taldeari iazko dirulaguntza bera mantentzea" proposatu dute, " beren lana baloratuz, eta musika eskolaren funtzionamendu ona azpimarratuz, Laudioko udalarentzako gastu handirik ez delakoan". Gizarte Laguntzetara bideratutako partida babestuko dutela adierazi dute, " betiere, laguntza hauek nola banatzen diren argi utziz". Langabetuentzako eta jubilatzear daudenentzako bertako lan sustapenerako laurogeita hamar mila euro bideratzea da beste emendakinetako bat.
Egindako emendakin guztien berri jaso daiteke euren blog eta atarietan.