Jada gertu dago Arabako Kuarila Arteko Bertso Txapelketaren egun handia. Larunbat honetan Aramaion festa giroa izango da goizetik hasita, eta nola ez, Aiaraldeko Altubepekoak taldea finalisten artean egonik, eskualdetik aterako den autobusa antolatu du Bertsozaleen Elkarteak.
Bertsolariak animatzera
Egunpasa ederra egiteko aitzakiarik ez da faltako. Dohainik izango baita Laudio eta Amurriotik pasako den autobuserako txartela. Aiaraldeko 6 bertsolariak animatzeko aiararrez betetzeko deia luzatu nahi izan dute bertsozaleek. Kantuan arituko dira Serapio Lopez (Ziorraga), Unai Mendibil (Amurrio), Ainhoa COmas (Amurrio), Iñaki Cabeza (Laudio), Julen Eizagirre (Amurrio) eta Izar Mendiguren (Laudio) bertsolariak. Finalerdietan saio orekatua egin ostean, beroketa lanetan ari dira larunbateko hitzordurako.
Animatzen diren bertsozale, lagun, senide eta herritarrentzako prest, 10:00etan Laudioko Institutuan izango da irteera, eta jarraian, Amurrioko Elizako biribilgunetik pasako da autobusa, 10:15ean.
Eguerdian poteoa abiatuko da Aramaioko plazatik, eta 14:30ean bazkaria izango da frontoian. Txosna, sagardo kupelak... giroturik eta sabelak asetuta, 17:30ean hasiko da Finala frontoian bertan. Idatzizko atalean Gasteizko Martin Ttipia eta Aramaioko Ai Ene! arituko dira lehian. Gaia honakoa izango dute: "Zer falta zaio Arabari?".
Bat-batekoan aldiz, Aiaraldeko Altubepekoak arituko dira Aguraingo Sorginetxeren aurka bertsotan. Leiha eta giro bikaina ziurtaturik dago, inoiz baino gazteagoa izango da Txapelketa.
Autobusean lekua gordetzeko
Autobusean izena emateko araba.sustapena@bertsozale.com helbide elektronikora mezua idatzi beharko da ahal bait arinen.
Bazkarirako txartela edota finalerako sarrerak eskuratzeko internet bidez egin daiteke www.bertsosarrerak.eu atarian sartuz, edota ohiko tabernetara joz. Laudion Ilargi Tabernan egongo dira salgai, Amurrion berriz, Txokogorrin.
Bazkaria eta saiorako bono arruntak 25 € balio du, bazkideentzako 20 €, eta 16 urtetik beherakoentzat 15 €. Saioa soilik ikusi nahi duenarentzat, finaleko prezioa 7€koa izango da, 5 €koa bazkideentzako, eta 16 urtetik beherakoek dohainik izango dute.