Joan zen ostiralean, arratsaldeko zortzietan ekitaldi politikoa egin zuen Laudioko PSE EEk Aldaikorreka plazan. Bertan, Txaro Sarasua Laudioko PSE EEren zerrenda burua eta Txarli Prieto Arabako ahaldun nagusia izateko hautagaia izan ziren hizlari.
Lorca herrian (Murtzia) lurrikararen eragina jasan behar izan zutenekin elkartasuna adierazi eta gero, Laudioko udal gobernuan 8 urtez izandako EAJ taldearentzat izan ziren Txaro Sarasuaren hasierako hitzak. Aldaikorrekako parkinarekin eta zaborra biltzeko sistema berriarekin EAJk dirua alferrik galdu duela salatu eta PSE EE "gutxiagorekin gehiago egingo duela" aipatu zuen.
Txaro Sarasuak Laudioko udala herritarren parte hartzera zabaltzeko asmoa azaldu zuen. Hirigintza eta etxebizitza arloan, alokairua bultzatu, adinduentzako etxebizitza tutelatuak sortu eta etxebizitza zaharrak eraberritzeko laguntzak bultzatzea izan ziren bere proposamenak, Laudioko ondareen inbentarioa egitearekin batera.
Lan arloan, enplegu mahai bat osatzea eta eskualde mailako industrialdea abiarazteko proiektuak aipatu zituen PSE EEko hautagaiak.
Euskarari dagokionez, "gatazkak eta gaitzezpenak saihestuz, elebitasun efektibo baten alde" agertu zen. Kultura gaiei dagokienez, legealdi honetan Altzarraten erabilera anitzetako aretoa eraiki eta Lamuzako parkea berreskuratzeko lanak egin beharko direla aipatu zuen Txaro Sarasuak, horretarako Aldundia eta Jaurlaritzaren finantzazioa beharrezkoak izango direla azpimarratuz.
Txarli Prieto, Arabako Aldundirako hautagaiak, bere lehentasuna krisi ekonomikoari kontra egitea izango dela iragarri zuen, kontsumoa bereziki larri dabilelako Araban. Energia berriztagarrien alde agertu zen ere bai eta PSE EE Garoñako zentrala ixtearen aldekoa dela azaldu zuen.