Garai Plazan egindako ekitaldian, Bildu Artziniegako kideak jendaurrean aurkeztu eta aurrera begira dauzkaten asmoak agertu zituzten. Ondoren, hautagaitza babesten duten hainbat herritarekin argazkia egin zuten.
Atzo arratsaldez, 50 lagun inguru entzule zirela, 'Bildu Artziniega' koalizioko kideek udal-hauteskundeetara aurkeztuko duen zerrendaren aurkezpena egin zuten. Hautagaitzako hiru kidek egin zuten berba, Joseba Vivancok, Bea Holgadok eta Fernando Ureta zerrendaburuak, eta hirurek adierazi zuten Bildu Artziniegak "herritarrak kontuan izan eta inplikatuko dituen beste politika mota bat" egiteko sortu dela, eta "aniztasunetik abiatuta" Artziniegako "abertzale eta ezkertiar" guztiei zabaldutako aukera bat plazaratu nahi izan dutela. Ekitaldiaren ostean, hautagaiek Bildu babesten duten hainbat herritarrekin argazkia egin zuten udaletxearen aurrean.
Edonola ere, Bildu Artziniegakoak zein gainontzeko herrietako hautagaiak aste honetan Epaitegi Gorenak erabakiko suenaren zain daude; izan ere, gaur bertan estatuko fiskaltzak Bilduko zerrenda guztien aurkako inpugnazioa aurkeztu du "Batasunak kutsatuta" daudela eta hautagai askok "ETA-Batasunarekin lotura handia" dutela argudiatuta.