Laudioko jaiak aurrera doaz, eta lehen txandari agur egingo diote gaua bukatzen denean. Hala ere, abuztuaren 25era bitarte bada zer egin eta zer ikusirik Laudion. Hamaika ekitaldiren artean, antzerkia eta zinea.
Euskarazko antzerkiak 'nahi baino gutxiago'
Egitarauari so egin eta gaztelera da nagusi. Aiaraldeako 'euskaldunok nahiko genukeena baino gutxiago' dira aurten ere ikuskizunak. Dena den, arte dramatikoa atsegin duenak egunez egun izango du ekitaldi bat edo bestez gozatzeko aukera.
Gaur bertan esaterako, bi ikuskizun izango dira 19:00etatik aurrera Pergola Eszena Gunean. "Un maño en Nueva York" eta "Monseiur Culbuto", hurrenez hurren.
Bigarren txandan aldiz, Berakatz egunean umeentzako berbena-antzerkia izango da toki berean: "Dj Thobben eta Lore Power". Arratsaldeko seietan hasiko da emankizuna Eidabe taldearen eskutik.
Biharamunean, abuztuak 26, Hortzmuga taldeak antzeztuko du "Olimpicas 2012", eta 27an, eguerdiko hamabietan hasiko da Pergolan, Cia Chaise A Poteurs taldearen "El montón" ikuskizuna. Iluntzean berriz, umorea izango dugu nagusi Peli Almuedoren laguntzaz. 9etatik aurrera aurkeztuko ditu kontakizun barregarrienak.
Odoloste eguna ez da hankamotz geratuko. Kirikiño Aisialdi Taldeak "Korri eta Xalto" pailazoak gonbidatu baititu, 18:00etatik aurrera Pergolako umeak dibertitzeko asmoz. Eta ordu berean baina azken egunean, amaitzeko, "On egin, Mon Amour" antzezlana izango da euskaraz.
Zinema jaien artean
Ohikoa den bezala, abuztuak 18tik 24ra bitartean zine gauak antolatuko dira gaueko 10etan. Laburmetraiak, luzemetraiak...genero ugaritan nahastuak eta gaztelaniaz zein euskaraz.