Herenegun, abenduak 16, Bai Euskarari ziurtagiriaren banaketa-ekitaldia egin zen Kultur Etxean. Zeremonia arratsaldeko zortzietan hasi zen, Unai Mendibilek botatako bertsoekin, eta bertan Laudion euskararen normalizazioaren alde lan egiten duten entitate guztiei egunerokoan egiten duten ahalegina eskertu zieten. Laudioko enpresa, saltoki eta era guztietako hainbat erakundek zegokien ziurtagiria jaso zuten: "Bidean", "Zerbitzua euskaraz" edo "lana eta zerbitzua euskaraz" ezaugarriaren aitortza. Talde hauetako ordezkari batzuek euren proiektuen eta Laudion euskararen alde egin duten lanaren inguruko hitzalditxoak bota zituzten.
Saritu zituzten hamazazpi elkarteen artean, Aiaraldea kultura eta komunikazio erakundea dago. Euskararen Gizarte Erakundeen Kontseiluak Bai Euskarari ziurtagiria sortu zuen 2000. urtean, eta 2007. urtean Ziurtagiriaren Elkarteak horren ardura hartu zuen, ziurtagiriaren bitartez euskara lan mundura eramateko. Elkartearen helburua euskara orain arte ezezaguna izan den eremuetara eramatea da, eta horretarako zenbait entitate sozioekonomikoren kemenaz baliatzen da.
Bai Euskarari ziurtagiriaren elkartearen proiektuak harro egoteko arrazoia eskaintzen die saritutako taldeei, eta euren eguneroko jardunean euskaraz baliatzen direla frogatzeko erreminta luzatzen die, ziurtagiria. Ziurtagiriak euskarak lanerako balio duela erakusten du, inolako zalantzarik gabe.
Ziurtagiria jaso dutenen zerrenda
- Udal Lanbide Heziketa Eskola
- Nubiola
- Gometegi
- Jez
- Hitz logopedia
- Bazter
- Indriska
- Arrañope
- Hyundai
- Talleres Fuentes
- Tximeleta
- Tipi-tapa akademia
- Goikogane M.T.
- Aiaraldea Komunikazio Leihoa
- Leo Barañano abokatua
- Diskodantza
- Eusko PC