Zazpigarren urtez antolatu dute Europa mailako Mugikortasun Jasangarriaren Astearen baitan egun berezi hau. Autoak alde batera utzi, eta herriguneetatik mugitzeko beste garraio aukerarik badela erakutsi nahi dute honela. Zaila suertatzen den arren, auto eta garraiobide pribatuen erabilera orekatuagoa egiteko deia egin nahi da jai egun honen bitartez. Zentzuzko eta neurrizko erabilera baten aldekoa, hain zuzen.
Goizeko martxak
Goizeko zitak dira ezagunenak. Bizikletaz, irristaketan edota oinez egin ahal izango dira ibilaldi herrikoiak. Bertako ziklisten Llodiana Elkarteak eta Aldaiko Irristaketa Taldea arituko dira gidari lanetan. Aldaikoerreka plazatik abiatuko dira bi ibilbideak, 10 kilometrokoa bata, eta 5 kilometrokoa bestea. 10:30ean izen ematea hasiko da eta 11:15ean martxan abiatuko dira bertaratutakoak.
Martxa luzea herriko ia auzo guztietatik pasako da (Aretatik Ugartera, Gardeara eta buelta Erdigunera). Martxa laburrak aldiz, erdigunetik Gardeara doan ibilbidea egingo du. Azken hori, oinezkoei eta patinatzaile hasiberriei zuzenduta dago bereziki.
Eguerdiko ordu baterako martxak bukatuko direla aurreikusi dute. Parte-hartzaileek eta martxistek, jhainbat joko eta proposamenekin entretenitzeko aukera izango dute. Txikienek gaztelu puzgarriak, bide-hezkuntzarako zirkuituak... edukiko dituzte eskura.
Opariak jokoan
Bukatzeko, parte-hartzaileen artean zozketatuko dira mendiko bizikleta, patinak eta beste hainbat opari.