Herri Plangintzarako Arau Subsidiarioaren (HPAS/PGOU) inguruko eztabaidak aurrera doaz. Orain hilabete batzuk erabaki zuen Udalak, Areta, Nerbioi kalea, Karmen kalea eta Fleming Doktorea kaleetako zenbait eraikin eraistea aurreikusten duen plana. Nerbioi ibaian egon daitezkeen uholdeetako kalteak saihestea da plan honen xedea, besteak beste. Neurri honek 400 familiari baino gehiagori eragiten dio, Berlojatzen Elkarteak azaldu duenez.
Martxoan prentsan kaleratutako informazioari esker jakin zuten auzokideek plan honen berri. Orduan osatu zuten elkartea, eta geroztik, lanean dihardute HPAS moldatu eta aukera berriak aztertzen. Auzokideen prestutasunarekin beste HPAS/PGOU bat aurkeztu zioten udalari alternatiba gisa.
Plan berri honetan, eraisketak ekiditeko helburuarekin zera proposatzen da: Aretarako bide zaharrak zabaltzeari utzi, eta Villosa Lantegiko gune bat erabiliz, ibai nabigaziorako parke bat egitea.
Berlojatzen Elkartean diotenez, LKS zein URAk (Eusko Jaurlaritzako Ur Agentzia) ez diote momentuz uko egin proposamen honi. " Aukerak egon badaudela" argi dute auzokide hauek.
"Udalaren erabaki soila" izan dela aipatu dute Berlojatzenekoek. Ez dutela erabaki honetan parte hartzeko aukerarik izan orain artean. Euren etxebizitzak eraitsi behar dituztela esan zieten, eta euren etxebizitzak berkokatzeko lana promotore baten eskuetan egongo zela.
Alberto Barrios elkarteko lehendakariaren ustez, "auzokideengan sortzen duen kaltea izugarria da. Ez dute konponketak jartzeko aukerarik, ezta euren etxeetan igogailua jartzeko obrak egiterik ere. Ordenamendutik at geratzen diren momentutik, euren pisuak saltzeko aukerak eta salneurriak behera egingo dute nabarmen".
Eraisketak ekiditeko proposamena
Elkarteko kideek argi dute aipatutako eraikinen eraisketa ez dela bidea. Udalak beregain hartzea ezinezkoa delako batetik, eta laudiar asko kaltetzen duen erabakia delako bestetik. Etxebizitza oinarrizko eskubidea izanik, plana moldatzeaz gain, orain arte desagerraraztear dauden eraikinak "babestutako eraikin" izendatzea eskatuko dio udalari.
Maiatzaren 25ean elkartuko dira HPAS/PGOU moldatzeko ahaleginak eginez. Informazio gehiago eskuratu nahi izanez gero blogean sar zaitezkete:
http://realojosllodio.blogspot.com