Topaguneak Irakurri, gozatu eta oparitu egitasmoaren laugarren edizioa aurkeztu du Bilbon. Hego Euskal Herriko 16 herritan abiatuko da laster irakurzaletasuna bultzatzeko kanpaina.
Laudion, Basalarrina Euskara Elkartea arduratuko da egitasmo hori aurrera eramateaz. Herriko liburutegira joatea da egitasmoan parte hartzeko lehen pausua. Euskarazko liburu bat maileguan hartu, eta irakurtzea, hain zuzen. Bukatutakoan, liburua itzultzera joan eta fitxa sinple bat bete beharko da: zein liburu izan den irakurritakoa, zer inpresio jaso dugun hura irakurtzean... eta fitxa betetakoan, liburuzainak, erosketa-txekea emango dio trukean dagokionari. Hitzartutako liburudendara joan, eta 'oparia' egitea izango da azken urratsa. Lagunari, familiakoari edo norbere buruari. Baina betiere gozamenerako iturri.
Txartelarekin doanak %25eko beherapena izango du euskarazko liburu berria ordaintzerakoan. Basalarrinako kide denak, aldiz, %50eko beherapena izango du.
Liburuaren Nazioarteko Eguna
Bihar hasiko da kanpaina, Liburuaren Nazioarteko Egunean. Euskarazko irakurzaletasuna bultzatzeko asmoarekin abiatuko da Laudion ere. Uztailaren 24ra arte, irakurri, gozatu eta oparitzeko aukera zabalik izango da.