Urtarrilean Aiara eskualdeko ikastetxeetako kideak (irakasle, guraso, langile eta ikasleak) elkartu ginen. Euskal Herriko beste hainbat tokitan jorratutako bidea ezagututa, aplikatzen hasia den LOMCE legeari gure inguru hurbileko hezkuntza komunitatetik erantzun bat bideratzeko asmoak bildu gintuen.
Ekimenaren ondorioz Aiaraldeko Gure Hezkuntza Plataforma sortu dugu. Hezkuntzan ari diren norbanakoz osatutako foro irekia sortu dugu bi helburu nagusirekin: LOMCEaren inposizioen aurkako erantzuna aktibatzea eta nahi dugun Hezkuntza Sistema berriaren eraikuntzarako urratsak ematen hastea. Plataformak ekimenak bideratu nahi ditu, ikastetxe bakoitzeko hezkuntza komunitateak garatzekoak zein udalerrietan lantzekoak, irekiak eta parte hartzaileak.
Aiarako ikastetxe eta herri ezberdinetako 40 pertsona inguru batu gara dagoeneko,12 ikastetxeetakoak eta oraindik, jakina, ekimena zabaltzeko lanean ari gara. Plataformaren aurkezpena martxoaren 22an burutu genuen Laudioko Aldai Plazan. Lehen bi dinamikak ere plazaratu genituen: “LOMCErik gabeko herriak” ekimena eta Hezkuntza Plataformen Topaguneak bultzatuko duen sinadura bilketaren eskualderako abiapuntua.