Gazteoi sentimenduak nahasten zaizkigu sistemarekin lerrokatutako komunikabide, alderdi eta instituzio ezberdinetatik istorio berdina behin eta berriro entzuten dugunean. Zergatik ezin naiteke gurasoen etxetik kanpo bizi? Zergatik ari da hezkuntza geroz eta gehiago garestitzen eta elitizatzen? Zer gehiago egin dezaket lana topatzeko? Zergatik joan behar naiz atzerrira lanera?
Antolatzean, eraikitzean eta borrokatzean dago gakoa. Ezinbestekoak dira hirurak.
Antolatu. Zapaldu guztien artean bloke bat osatu behar dugu, eragiteko ahalik eta gaitasun gehien izateko. Eraiki. Egoera latzenetan ere alternatibak eraikitzeko gai garela erakutsi du historiak. Eraiki dezagun gaurdanik guk nahi dugun etorkizuna... Eta borrokatu. Borroka delako alternatibak eraikitzeko, erantzuleak markatzeko eta gure jarduna aurrera eramateko bide bakarra!
Gazteok erabaki dugu kaleak hartzera goazela, borrokarako hautua egina dugu. Egoerari buelta eman ahal zaio eta hori gauzatzera goaz, gure etorkizuna marraztu eta eraikitzera goaz! Bete ditzagun Amurrioko kaleak gazteon aldarriz eta gazteon konpromisoz.