Ez da etxerik asko Laudion, eiki, GOIKOGANE M.T-an kiderik izan ez duenik, 1959an sortu zenetik. Orduan, Goikogan daritzon tontorrean gurutze-buzoia ipinita, ibilaldi luzea hasi zuen. 1967an lehenbiziko egoitza ireki zuen; egun, berriz, hirugarrena du. 1970ean, Gorbeiako Austegiarmin esaten dioten saroian aterbe-etxe ederra eraiki zuen. Gaur-egun, 1200 bazkide inguru garela, urtean 20 bat ibilaldi – beste 14 bat gazteentzako – antolatuz bidean aitzina goaz; eta gure bazkideetako batzuk, berriz, gora eta gora beti: Sagarmatha (Everest) mendirik garaienera igo dena bat, Makalu, Pamir, Pico Lenin, Gasherbrum...eta han-hor-hemen beste hainbatetara igo direnak anitz eta anitz. 58 urte Laudion historia egiten ibilian ibiliz, milioika urrats beti auzolanean.
Orain beste asmo bat darabilgu, amets eta ez txoro, kiroltoki batean hatxorde edo rokodromoa egiteko asmoa, alegia.
Bi il bete-beteak izan ditugu, pabilioiak ikusten, toki-saltzaileekin nahiz bankariekin hitz egiten, eta, azkenean, erdietsi egin dugu. Idoro dugun toki egoki bakarra. Aurrezturiko diruaz eta mailegua eskatuz tokia erosi, eta hatxordea eraikitzeko lanak hasi ahal ditugu.
Mundua globo bihurtu dutenetik, mendizaletasunak beti oinatz izan dituen goiasmo zaharrei, hots, elkartasunari eta adiskidetasunari jarraiki beharra dugu, are beharrago ere. Mendiak dakarren askatasunari atxeki behar gatzaizkion era berean.
Laudioko Udalak gure egitasmo honetan lagunduko digula adiarazi digu eta bihoazkio, aurretik, gure eskerrak.
Historia egiten aurrera joanen gara, bai, eta laster gure bazkideetako baten batek Euskal Herriko haitzigo txapelketa irabaziko duelakoan gagoz. Esan beza geroak.