Hutsak Betetzen Amurrion uztailean sortutako kolektibo bat da. Gure helburu nagusia asanblada ireki bat sortzea da, zeinetan edozein pertsonak ekintza, hitzaldi, kontzertu edota mobilizazio proposamenak egin ahalko lituzkeen, bere genero, jatorri, adin edo ideiak direnak direla.
Funtsean, jendarte borrokarako kolektibo herrikoi bat sortzea da asmoa, inongo alderdi edo ideiarekiko loturarik gabekoa. Kapitalismoaren, patriarkatuaren eta faxismoaren inposizioez nazkatua dagoen orori zabalik egongo den talde bat. Ez dugu borroka bakar batean inplikatu nahi, gugan eragina duten borroka guztietan baizik, edo horretan ahalegindu nahi dugu behintzat. Etxegabetxeak, langileak, langabetuak, animalien eskubideak, feminismoa etbr.
Gauzak hala, herriaren ahotsa izatea lortu nahi du kolektibo honek, ahotsik gabekoen ahotsa, gure ilusio zapuztuenak eta gure amets desiratuenak, instituzioek aspaldi eman baitziguten sorbalda.
Kolektibo moduan daukagun ibilbidea laburra den arren, hainbat ekintzatan hartu dugu parte. Abuztuaren 15ean Amurrion eginiko zezenketen aurkako elkarretaratzea babestu genuen. Adin guztietako pertsonak bildu ziren bertan, eta baita Bizkaiko animalien aldeko kolektibo bat ere. Gure aldetik, Amurrioko Udalak zezenketei eskaintzen dien aurrekontua atera genuen argitara. Modu horretan, zezenketetara bideratua dagoen diru xahutzea ezagutarazi genien Amurrioko biztanleei, kartelen eta sare sozialen bidez.
Arestian aipatutako gai asko jorratzea gustatuko litzaiguke, baina pazientziarekin. Errealista izanda, ez baita erraza. Ikusi ahal izan dugu batasun falta handia dagoela gure inguruan, eta gure beste asmo nagusi bat bada jendea batzea, pertsonak batzea, enpatia ezagutzen dutenak eta aldaketa sozialaren alde egiteko prest daudenak.
Orain hainbat ekintza ditugu buruan. Horietako bat urriaren 16an Laudioko Gaztetxean kontzertu batzuk antolatzea da, proiektua finantzatzeari begira.
Norbait asanbladetara gerturatzeko interesa badu, dudarik edo proposamenik badu edo gure ekintzen berri izan nahi badu gurekin kontaktuan jarri daiteke posta elektronikoaren edo sare sozialen bidez.
E-maila: colectivollenandovacios@gmail.com
Facebook: Llenando Vacios Colectivos
Twitter: @ColectivoLV