Durango eta Iruñea batuko dituen Gure Esku Dago dinamikaren baitan murgilduta gaude. Katalunia, Eskozia eta munduko beste hainbat herrialde bezala herri gisa zer izan nahi dugun erabakitzeko eskubidearen alde, nola antolatu edo bizi nahi dugun erabakitzeko. Kanpotik inork inposatu gabe guk erabaki nahi dugu.
Espainiar eta Frantziar estatuen ukazioagatik Euskal Herriak asko sufritu du, baina askatasuna lortzeko gure ametsa geldiezina da.
Emozio berezi bat sentiarazten dit ekainean guztion eskuek Durango eta Iruñea lotuko dutela pentsatzeak, baita Euskal Herriko hamaika txokotan horren alde lanean dauden asko daudela sentitzeak ere.
Guzti honek aurreneko Korrikak sortu ziren garaiak dakarzkit gogora, nire semeak oso txikiak zirenekoak, egunero egiten zen etapa egunkarietan markatzen genuenetakoak. Atsedenik gabe euskararen alde jendea etengabe korrika zegoela jakiteak sekulako zirrara sortzen zigun! Ekimen honekin berdina gertatzen zait.
Indarrak batu behar ditugu, Euskal Herria maite dugun guztiok askatasunerantz pausoa emateko, muga eta oztoporik gabe, erabakitzeko eskubidearekin eta autodetereminazioarekin.Bidea luzea izango da, baina gure esku dago lortzea. Ilusioa dugunak asko gara. Gainontzekoak aktibatu behar ditugu, gure esku dago lortzea. Ekimenaren bideoak dioen bezala, jende zoriontsua herri aske batean lortzea munduko beste herriekin elkartasunean Gure Esku dago!