Ez dakit nik... Egiaz ere, Euskal Herrian egotekotan, pentsatzen dut joan nintekeela ni hitzaldiren batera baldin... politikaz, literaturaz, euskalgintzaz, pilotaz, edo... orain gogora heltzen ez zaizkidan beste kontu batzuri buruzkoa balitz ere...
Gaur arratsaldean, baina, hemen arratsaldeko 6,30etan ("arratseko" esango nuke hobeki, hemen arratsalderik ez baitago, esateko ere...) eta Euskal Herrian gauerdia askito pasea izango denean, "Lurraldea, Paisaia eta Ondareari" buruzko hitzaldi batera inguratuko naiz... "Arkitekturaren Arkeologia eta Esku-hartze Errestauratzailea"...
Adituak ditut nik hemen aspaldi honetan hitzaldiak, bai, honetaz eta hartaz... Oraingoan, baina, batere ez dakidan, batere ulertzen ez dudan, eta guztizko ezjakin galanta naizen gai batez entzungo dut hitzaldia...
Ez dakit ezertxo ere ikasiko dudan; ez dakit hizlaria nire buru gogorrean ezertxo ere josteko gauza izango den, baina, Euskal Herriko Unibertsitateko Agustin Azkarate Garai-Olaun elorrioarra izango da hizlaria, eta..., aitor dut, badut nik orain hitz batzuk, hitzegiteko modu batzuk aditzeko premia buru-bihotzetan...
Eta egarriak ura bezala, hizkuntza baten beharra ere badut... Lauzpabost hitz eta esaldi ziztrin baino ez badira ere...
Gezurra ematen du, hain gauza txikiak nolako bihotz altxagarria eman diezazukeen ohiko hitzak, doinuak, usainak, janariak eta... denak! arrotz dituzunean.