Iñaki Aldama, Mendiko Lagunak mendi taldeko mendizale amurrioarra, Nun izeneko 7.135 metroko mendia igotzen saiatuko da hurrengo abuztuan. Hurrengo ostegunean, uztailaren 29an, hartuko dute Kaxmirrerako bidea, Indiaren kontrolpean dagoen zonalderako bidea, hain zuzen, Nun 2010 espedizioa osatzen duten Amurrio, Berriz eta Gasteizko zazpi kideek.
Gauzak horrela, aiaraldea.com komunikazio leihoak espedizio horretako Amurrioko kidea elkarrizketatu du:
Zergatik aukeratu duzue Nun mendia?
Kasualitate hutsa izan zen, aurten mendi garai batera joan nahi genuen eta bilatzen hasi ginen abuztuan egin zitekeen mendiren bat. Interneten bilatzen, Nun-Kun mendigunea aurkitu genuen eta uztailetik irailera bitartekoa zen egiteko garairik onena. Guk oporrak abuztuan genituen eta gainera Indian zegoenez herrialde berri bat ezagutzeko aukera apartekoa iruditu zitzaigun.
Alpinista asko joaten dira mendi horretara?
Dauzkagun argibideen arabera jende gutxi doa mendi horretara, baina batek daki, hara heldu arte ez dugu jakingo.
Zer ezaugarri dauzka mendiak?
Oinarrizko kanpalekutik hasita bi zatitan banatuko nuke mendia. 1.zatian, oinarrizko kanpalekutik (4.200m) bigarren kanpalekuraino (5.400m) ,zailtasun teknikoak ez dira oso handiak, gainera, bigarren kanpalekura heltzeko azkeneko zatian 5 kilometroko lautada bat zeharkatu behar da. 2. zatian mendi aren zailtasunik handienak hasten dira. Bigarren kanpalekutik - hirugarrenera (6.200m) 45-50º-ko elur malda dago, guk Monte Perdidoko ipar aurpegiko korridorearekin alderatzen dugu. Hirugarren kanpalekutik - gailurrera (7.135m) 50-55º-ko elur malda dago eta gailurreko aristara atera baino lehen harkaitzean III-III+ graduko 40 metroko eskalada egin behar da, hortik (6.900m) gailurrera arista erraz batetatik heltzen da. Ondoren, gailurrera igotzeko egin dugun bidea desegin behar da jaisteko.
Espedizioan lagunduko dizuen babeslerik lortu duzue?
Zorionez zazpi babesle ofizial ditugu , kide bakoitzeko bat (bakoitzak bere lana). Kamiseta batzuk egin ditugu oroigarri bat edukitzeko eta diru pixka bat ateratzeko, besterik gabe. Eskerrak eman behar dizkiegu orain eta Broad Peak-era joan ginean kamisetak erosi dituzten guztiei.
2007an zuetako batzuek Broad Peak igo zenuten (8.047 metro), eta orduko hartan ekimen bereziak egin zenituzten dirua batzeko?
Aurreko espedizioan kamisetak egin eta saldu genituen dirua ateratzeko. Gainera espediziotik bueltan bideotxo bat prestatu genuen eta hainbat hitzaldi eman genituen. Oraingoan, asmoa berdina da, kamiseta batzuk egin ditugu eta bueltan bideo bat prestatuko dugu grabatutako irudiekin. Gero lekuren batetik deitzen badigute, hara joango gara gure istorioa kontatzera.
Espedizio horri buruzko zer oroitzapen dituzu?
Oso oroitzapen onak ditut. Mendi bikaina da Broad Peak eta are bikainagoa joan ginen taldea.
Zenbat lagun joan zineten?
Zazpi lagun ginen hasiera batean baina bi ezin izan ziren joan lanagatik eta azkenean bost lagun joan ginen.
Beste zortzi milakorik egingo zenuke?
Beste zortzimilako batera joango banintz galdetzen badidazu, erantzungo nizuke ez dakidala. Dakidan gauza bakarra da aurten Indiara noala eta datorren urteetan batek daki zer egingo dudan.
Aukeratu ahal bazenu, zer mendi igotzen saiatuko zinateke?
Mendi asko daude egiteko eta denbora gutxi guztiak igotzeko.
Mundu osoan ibili zara alpinismoa egiten ezta?
Pirinioek, Alpeek, Andeek eta Himalaiak bidaiatzeko eta jendea ezagutzeko aukera eman didate. Ezingo nuke mendi bat bereziki aukeratu ezta mendikate bat, guztiek bere xarma daukate.
Zelan zaletu zinen mendira?
Mendiko Lagunak taldeak antolatzen zituen mendi irteeratan hasi nintzen mendira joaten, 18 urterekin. Ez neukan norekin joan mendira eta bertan izan nuen Euskal Herriko eta Piriniotako mendi asko ezagutzeko aukera. Oso giro jatorra dago irteera guztietan eta orain haiekin gutxitan joaten banaiz ere, ahal dudan irteetara joaten saiatzen naiz.
Bitartean, Nun espedizioaren berri izateko aukera dago http://nunmendia2010.blogspot.com/ webgunean.