Aiaraldean hainbat dira euren lurretan mahastiak dituzten baserri eta familiak. Amurrion, Arrastarian, Laudion, Okondon eta Aiaran mahastien uztaro garaian gaude eta azken egunotan etxean txakolina egiteko mahatsak jaso edota upeltegietara eraman dira, han saltzeko.
Urte osoko fruituak jaso berri dira eta upeltegietako jabeek jasotako mahatsak euro eta hogei zentimo ingurura ordainduko omen dute kiloa. Eguraldi kaskarra protagonista, mahasti gehienetan lan giroa sumatu da asteburuan. Aurtengoan jasotako mahatsaren kantitatea eta kalitatea ezin hobeak direla aipatu dute jatorri-izendapenaren arduradunek. Gainera, iaz baino tona gehiago jasoko dela uste da ,eta mahatsa garbi, osasuntsu eta bere heltze puntuan dago. Aste honetan aurtengo azkenengo tonak jasoko dituzte Arrastarian eta ondoren txakolinaren prestaketa-lanak eta lehendabiziko balorazioak egingo dira.
Arabako Txakolinaren arduradunen ustetan iazko 386.000 kilogramoak berdintzea paregabea izango litzateke, eta momentuz jasotzeko falta diren hektareak kontuan izanik, gauzak ongi doaz.
Urtarrilean zehar lehendabiziko dastapenak egingo dira eta EHUko kimikariek analitika datuak aurkeztuko dituzte.
Pasa den urtean jasotako tona guztiekin, 252.000 litro lortu ziren, 336.500 botila, hain zuzen ere, eta ekoizpena 2004ko emaitzak baino %13 oparoagoa izan zen, orain arte izandako mahats-biltze onenarekin konparatuz.
Beldui eta Garate Laudion, Xarmant eta Solaun Amurrion, Señorio de Astobiza Okondon, Arzabro Delikan eta Artomaña dira gaur egun Aiaraldean dauden zazpi upategiak, eta hurrengo urteetan beste bi egiteko proiektuak daude. Gainera, 2016 urtean mahastiek 110 hektarea hartuko dituzte, urtero miloi bat botila merkaturaturatzeko asmoz. Gaur egun, landatutako mahastiek 62 hektarea inguru osatzen dituzte eta 100 hektareara helduko dira hurrengo urteetan, nahiz eta orain soilik 47 hektarea ekoizpenean egon.
Arabako Txakolina jatorri-deituradun txakolinaren % 20 inguru Estatu Batuetan, Suedian, Norvegian, Frantzian, Japonian, Alemanian eta Erresuma Batuan saltzen da, eta gaur egun eskualdearen turismoan ikusmin eta eskari handia jasotzen ari den zerbitzua da, gastronomian murgildutako upeltegietara eginiko bisitaldi gidatuak direla-eta.