Zaldibarren atzo izandako finalean Markina izan zen garaile Amurrioren kontra 2-1 irabazi ondoren. Norgehiagokak biziak eta liskartsuak izan ziren.
Arabarrek kadete kategorian 10-22 irabazi zioten Markinako bikoteari. Amurrioko Goikolea eta Murga partidaren hasieran 0-9 aurreratu ziren eta maila horretan nagusitasun handia erakutsi zuten bizkaitarren kontra.
Gauzak horrela, Markinarrek txapela irabazteko, hurrengo bi norgehiagokak irabazi behar zituzten, eta horrela izan zen.
Aiaraldekoei irabaztea ez zen erraza izan. Gazte eta nagusien mailetan aurkako 8-16 altxatu behar izan zituzten bizkaitarrek.
Markinako Arrieta-Aretxabaleta eta Amurrioko Dorronsoro-Elejalde bikoteek jokatutako gazte-mailako partida finaleko norgehiagoka izan zen. Dorronsoro ikaragarri aritu zen 8-16 arte. Ondoren, Markinakoek markagailuari buelta eman eta partidua 20-16 jarri zen. Baina partida ez zen horrela amaituko ,eta Aiaraldekoak 20-21 irabazten jarri ziren. Azkenik, markinarrek 22-21 irabazi zuten Dorronsororen “gantxo” pozoindu batek txapan jo ostean.
Nagusien partidan, Amurrioko Gerrero-Cueva bikoteak Markinako Urionabarrenetxea-Castilloren kontra jokatu zuen. Aiararrak partida horretan ere 8-16 aurreratu ziren baina partidaren bigarrengo zatian, Urionabarrenetxearen joku paregabearen laguntzaz, norgehiagoka 22-18 irabazi zuten.
Sekulako lana aurtengo Herriarteko Txapelketan amurrioarrek egindakoa, gutxigatik ez dute txapela bailarara ekarri eta ziur egon gaitezke hurrengo urtean Aiaraldeko pilotariek Euskal Herriko pilotari onenen artean arituko direla berriro.