Goizeko seiak eta erdian kaleko zaratek esnatu naute, baina logaleak nengoen oraindik eta lotan geratu naiz berriro. Lo arinak ametsak sortarazten ditu, eta, beharbada, bart Ponpeiari buruzko irakurritako berriek elikatu dute izan dudan ametsa. Ponpeiako Ametsen etxetik hegan egiten atera naiz (zaharberritu dutela irakurri nuen bart), eta Amalfiko kostaldea, Capri eta Vesuvio gainetik hegan egin ondoren, Napoliko Umberto galerian sartzera joaten nintzenean auto baten klaxonak esnatu nau. Ezin izan dut orain dela urte batzuk egindako bidaia errepikatu, ezta ametsetan ere. Gutxienez oroimenarekin jarraitzeko Napolin lehenengo aldiz jan nituen espagetiak puttanesca erara bazkalduko ditugula pentsatu dut.
Gosaldu ondoren begiratu dut ia etxean geneuzkan espagetiak egiteko behar nituen osagai guztiak, eta zerrenda egin dut: espagetiak, oliba olioa, berakatzak, tomateak, kaiena, antxoak, kaparrak, oliba beltzak, perrexila eta albahaka. Bakarrik oliba beltzak falta zitzaizkidan. Falta hori ondo etorri zaigu; eguerdi aldean oliben bila joateko aitzakiarekin Josune eta biok kalera atera gara eta olibak eskuratu ondoren marianito bana hartzera joan gara, Laudion ongien prestatzen duten tabernara.
Etxean bueltan lanari ekin diot. Gurean oso sukaldari ona daukagu eta horregatik oso gutxitan sartzen gara besteok sukaldean bazkaria prestatzeko (hau aitzakia ematen du edo aitzakia da?). Baina gaur ausartu naiz; espagetiak eta saltsa alde berean egiten ere! Pixka bat estu geratu zait sukaldea, baina dena atera da ondo; hain ondo mandatu bat egin didatela: hemendik aurrera sarritan egitea, baina hobeto kaiena gutxiagoarekin.
Ezin dugu Napolira joan, baina bazkarian sukaldera ekarri dugu orain dela hainbat urte ikusi genituen lekuak eta bizi genituen momentuak.
A! Napolin espageti hauei “a la puttanesca” esaten diete putetxetan egiten omen zituztelako. Izena ez da hain zaharra; XX mendeko erdialdekoa? Ez dago argi ezer; batzuk esaten dute arrantzaleek arrantzatik etortzen zirenean putetxetara joaten zirela, eta eramaten zituzten antxoekin osatzen zutela errezeta; beste bertsioak esaten du Napolin jatetxe askotan putetxe bat zeukatela goiko solairuan, eta hortik etorri zitzaien izena espageti hauei.
Oso gozoak dira. Ez baduzue frogatu, aurrera: bilatu interneten errezeta batzuk, nahastu guztien aholkuak zuen nahierara, eta on egin!!!