Kontzertu ekonomikoaren eta kupoaren legeak onartu dituzte Madrilen. EAEko 2018ko aurrekontuak onartuko dira Gasteizen. EAJk eta PPk bi gauza hauen arteko erlaziorik ez dagoela esan dute behin eta berriz. Inozoarena eginez sinetsi nahi dudala esan dezaket; gehiagorik ezin dut esan, bestela inozo itxurak egitearen traza eman ordez, benetako tentela gisa agertuko nintzateke.
EAEko aurrekontuak direla eta, Sozietateen Gaineko Zerga murrizteko akordio batera helduko dira eskuineko bi alderdi eta, ezkertiarra izan gabe, ezkerreko alderdi dela esaten duen bat. Hots, hiru alderdi liberalak. Hirurak dira azken hamarkadan murrizketa sozialak ezarri dituztenak.
Madrilgo gorteetan parlamentarien % 88,5ak kupoaren legearen alde bozkatu zuen, eta %10,9ak kontra; baina 2 parlamentarien abstentzio botoek hautsak harrotu zituzten, eta EAJren arduradun batzuen adierazpenetan oso ondo ikusi dugu zein ondo erabiltzen duten formula arrunt bat besteei erruak leporatzeko: etsaia ahalik eta hurbilen bilatzea.
Ortuzarrek sarritan erabiltzen du formula hori argumentuen ordez, behar bada argumentuak ez dituelako. Gai honetaz hau esan zuen: “EAJren kontra egin nahian, euskal herritarren interes orokorren kontra egiten dute. Hau ez dugu inoiz ahaztuko”.
Nik hitz horiek parafraseatuko nituzke aurrekontuetan inolako eztabaida sozialik onartu gabe, patronalaren eta kapitalaren aldeko neurriak hartu dituztenei buruz hau esateko: “Patronalaren eta kapitalaren alde egin nahian, euskal langileen interes orokorren kontra egiten dute. Hau ez dugu inoiz ahaztuko”.