Testu hau ilustratzen duen argazkiko "karteltxoa" Laudioko anbulatorioko ate batean ikusi dut eta ezin izan dut komentario bat ozen erreprimitu:
‒Hara, beste ausart bat!
Zein pertsona motak idatzi du mezua? Sinaduratik ("un indignado"), zer ondoriozta dezakegu?
Egileak sinaduran gezurrik esaten ez badu, zerekin edo norekin dago haserre? Laudioko EAGn beti medikurik ez egotearen arduradunekin, ala alkatearekin? Benetan "indignado" badago, bere burua argitu beharko luke, pixka bat pentsatu. Haserre dago Laudioko EAGn medikurik ez dagoelako denbora osoan? Bada, Osakidetza kudeatzen dutenekin egon beharko luke. Haserre dago ez dakielako zer egiten duen alkateak? Bada, pixka bat gehiago irakurri besterik ez du egin behar, EITBtik haratago informatu,... eta abar.
Bi folio horietan idatzitakotik soilik ondoriozta daiteke EAGn medikurik ez egoteak sortzen duela egilearen balizko haserrea. Nik uste dut "karteltxoaren" egilea gezurretan ari dela. Gezurtiak bere gezurrak mozorrotu egiten ditu ez direnarekin estaltzeko, egiaren itxura izan dezaten. Argazkiko "karteltxoetan" bi aldiz erreparatu behar da konturatzeko "queremos medico (sic) en pac siempre" esaten omen duena alkatea ez dela; letra txikia irakurri behar da "un indignado" dela jakiteko. Hau da: anonimoa da; zitala, bai, eta anonimoa: norbait interpelatzeko modurik koldarrena.
Hau da ateratzen dudan ondorioa: ezin dugu jakin "indignado" baten lana ote den; baina zalantzarik gabe gezurti batena da, koldarra gainera.
PS: “Kaltertxogileak” gaztelerazko ortografia ere ez du menderatzen.