Historian zeharko txakolinaren ibilbideaz Salvador Velilla historialaria arduratu da. Ikerlari trebearen pazientziarekin Urduñako artxiboetan (eta eskualdeko beste herri batzuetakoetan) murgildu da ardo honen historia osoa idazteko aukera ematen duten erreferentziak berreskuratzeko.
Irailaren 25ean Ardoa Nerbioi Garaian / El vino en el Alto Nervión hitzaldia eman zuen Velillak Urduñako Alondegian. Bertan, eskualdeko ardoaren historiaren errepaso sakona egin zuen: 800. urteko Urduñako mahastiei buruzko erreferentzietatik (Donemiliagako Kukullaren kartularioan) txakolina ekoizteari buruzkoak XX. eta XXI. mendeetaraino.
Historia horretan, laborantzarako, mahats-bilketarako, txakolinaren ekoizpenerako, salmentarako... nahitaezko arauak agertzen dira; tokiko produktua babesteko arauak, kanpoko ardoa inportatzeko debekua, bertako ardoa kontsumitu ez den bitartean... baita ardoaren eta txakolinaren salmentak udalerriari ematen zizkion diru-sarrera garrantzitsuei buruzko aipamenak ere. Dokumentu batzuetan, txakolinak zekarren ospe txarra ere agertzen da; beste batzuetan, berriz, sortzen ziren gatazkak ikusten dira.
Bigarren jardunaldia irailaren 28an izan zen: ibilbide gidatu bat Tiestos mahastiaraino. Txetxu Larrazabal ekoizleak, Salvador Velillarekin batera, Urduñako txakolinaren historia berria eta eta bere ekoizpenak dituen berezitasunak azaldu zizkien bertaratutakoei.
Duela hiru hamarkada baino gehixeago, Txetxu Larrazabal, bere familiarekin, aitzindarietako bat izan zen. Hasi berri ziren laboreen emaitzarik onenak lortzeko, Urduñakoek Errioxara jo zuten aholku eske. Landatzeko, inausteko eta abarrerako metodorik eraginkorrenak ikasi nahi zituzten.
Hasieran Errioxako inausketa metodoa aplikatu zuten eta Urduñako klimarako egokia ez zela egiaztatu zuten. Txetxu bera joan zen gero Irulegiko ardoaren ekoizleengana aholkularitza eske; egiaztatu zen Irulegiko inauste metodoak bermatzen zuela hobekien ekoizpena, mahatsondoa hobeto egokitzen zuelako hemengo klimara.
Tiestos lursail zeharreko ibilbidean Txetxu Larrazabalek mahastiak eskatzen duen etengabeko lana azaldu zuen, goialdeko eta finken sakostaren arteko lurraren eta mahatsen kalitate ezberdintasuna, mahastiak mildiuma bezalako izurriei aurre egiteko zenbat aldiz tratatu behar izana...
Salva eta Txetxu bat etorri ziren esatean mahastiak 17 aldiz behar izan dezakeela berariazko arreta urte batean, urteko gorabehera klimatikoen arabera.