Gizarte baten garapen maila deskribatzen duten alorretako bat menpekotasuna duten pertsonei ematen zaien tratua bada, geureak asko dauka hobetzeko.
Aiarako eskualdean, Udalek kudeatu eta gastuak Aldundiak ordaintzen duen Etxez-etxeko Laguntza Zerbitzua da menpekotasuna duten pertsonek duten laguntza bakarra.
Herritarren zaharkitzea dela eta eskaera handitu den une batean gauden honetan, langile eta enpresen zerbitzuaren murrizketa handia eman da.
Honek bazterketa bikoitza eragiten du emakumeengan. Alde batetik, gehien bat emakumeak dauden sektore batean ematen den enplegu galera bat delako. Eta bestetik, menpekotasuna duen pertsonaren familiako emakumeen lana handitu egiten delako, hauek duten lan merkaturako sarbidea oztopatuz; zoritxarrez oraindik, heldu eta gaixoen zaintzaren arduradun bakarrak beraiek izaten direlako.
Langile Komisioak, sektorean ordezkaritza duten gainontzeko sindikatuekin batera, mobilizazioak egin ditu eskualdean azkeneko hilabete hauetan. PPko foru gobernuak egindako murrizketak eta gero, sindikatuek, Arabako zerbitzua indartzeko dagoen beharra jakinarazi diegu administrazioetako kudeatzaile berriei.
Erantzunaren zain gaudela, Aiarako bizilagun guztiak gonbidatu nahi ditugu sektoreko langileen eskaerak babestu eta menpekotasuna duten pertsonen eta beren familien laguntza zerbitzua hobetzeko administrazioen inplikazioa eskatzera.