Mandazainak Gorbeialdean

Erabiltzailearen aurpegia

Gorbeialdean, era askotako ganaduak egon direnez, “artzain” hitza baino “pastore” berba erabili da gehiago.

Pastore artean, “mandazain” hitza erabili izan da mando-zaintza adierazteko.

Baziren aldi baten, Gorbeialdean, mandazain bi, bata baino bestea baragarriagoak.
Era askotako beharrak egiten zituzten, mandabiderik mandabide, batez be, buztarri-ganaduentzat ezinezkoak zirenak, zeinda, bidezidor, pasabide estu, aurgora-aurbehera garratz, istuki eta abarretako beharleku gatxak.

Jo eta ke zebiltzan gure mandazain biak, zeinek behar gehiago egin hogerleko batzuk irabazteko.
Biak lan eta lan baina, batak, beti gura izaten zuen besteak baino gehiago izan. Batak hage bat ekarten ba zuen narraz ziria sartuta, besteak bi. Horrela zebiltzan, norgehiagokan, bata bestearen lehian.

San Inazio egun batean, Egiriñaoko landako pagaduian, badiotso batak besteari:

- Hi, mundu guztiak zakik ni hi baino gehiago naizela mandazain beharretan eta mandoetan ere bai. Aiko, hauxe agindu hau egingo diat: mando bat saltzen badidak, nik bikoiztu egingo diat nire mando-elia.

- Hi, eta besterantz egiten badiagu zer? Nik neuk heuri saldu baharrean, hik heuk neuri saltzen badidak mando bat, biok mando-eli berdina edukiko diagu. Errekoño!

Zenbat mando zeuzkan mandazain bakoitzak? Zeuok atera kontuak, buruz zein ekuazio bidez.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide