Aiaraldean, gazteek sinatutako kontratuen artean %3 soilik izan dira finkoak

25 urte bitarteko gazteei egiten zaizkien 100 kontratuetatik 3 soilik dira mugagabeak. Horrek esan nahi du, bada, lan-kontratu guztiak kontuan hartuta, Aiaraldean sinatzen diren hamar kontratu finkoetatik bat soilik eragiten diela 25 urte bitarteko gazteei. Halaber, kontratuen % 34,01 soilik sinatu da emakumeekin. Bestalde, lan-kontratuen iraupenaren batez bestekoa 45 egunekoa izan da, aldi baterako kontratuen kopurua oso handia den seinale.

Laburbilduz, lan-prekarietate hazi egin da Aiaraldean 2011ko urtarrila eta urria artean. Lanbidek eta Enplegu Zerbitzu Publikoak (SEPE) emandako datuen arabera, guztira, 14.372 lan-kontratu sinatu dira, baina, horietatik % 96,10 aldi baterako izan dira. Zifra horrek, beraz, Arabako (% 94,26) eta Hego Euskal Herriko (% 96,02) tasa gainditzen du. Iaz, esaterako, 17.491 lan-kontratu izapidetu ziren, eta tenporalitate-tasa % 95 pasatxo izan zen.

Adin-taldeei dagokienez, kontratuen % 46,06 sinatu dira 30 eta 44 urte arteko langileekin eta kontratuen % 22,93, berriz, 25 eta 29 urte arteko langileekin. Aitzitik, 24 urte bitarteko gazteekin sinatutako kontratuak % 15,75ra murriztu dira. Dena den, kontratu gutxien sinatu dituztenak 45 urtetik gorako langileak izan dira: zehazki, % 15,24. 

Hego Euskal Herrian prekarietaterik handiena duen eskualdeetako bat da Aiaraldea. Datu ofizialen arabera, prekarietatea handiagoa da Urduñan; izan ere, bertan egin diren kontratuen %99,15 aldi baterako izan dira. Jarraian, Orozko (%98,19), Amurrio (%96,26) eta Laudio (%95,43) ditugu. Arrankudiagan, aldiz, tenporalitatea % 90,81ekoa izan da.