aiaraldea.eus

Memoriaren zati bat

Erabiltzailearen aurpegia Julen Arzuaga   Iritzia

Azaroaren 10ean Memoriaren Eguna izan zen. Lakuako gobernuak kaleratutako txostenean Aiaraldean ETAk 70 eta 80. hamarkadetan eragindako hildakoak agertzen dira: Fernando Amor (Aiara), Joaquín Becerra (Amurrio),  Félix eta Estanislao Galíndez anaiak (Amurrio), José Luis Vicente (Laudio) Ciriaco Sanz (Laudio). Zalantzarik ez dago, ETA erakundeak berak onartu zuelako bere autoretza.

Dokumentuan ETArena ez den biktima bakarra agertzen da, baina ikerketa gehiago behar omen du. Vicente Velasco 1976ko irailaren 27ko goizaldeko ordu biak aldera atera zen Laudioko Marbella tabernatik. Seiak inguruan bizi zen pentsioko eskaileratan topatu zuten odoletan. Egun batzuk geroago hil zen. Berrien agentzia baten arabera Aceros de Llodion greba deialdiarekin bat ez egiteagatik eraso egin zion langileen pikete batek. Enpresako langileek gezurtatu zuten bertsioa, erasoa greba eguneko bezperan izan zela azpimarratuz. Beste iturri batzuen arabera poliziarekin lotutako “inkontrolatuek” erail omen zuten.

Argitu gabeko kasuari beste hutsune batzuk gehitu behar zaizkio. Fontso Isasi eta Pili Arzuaga sakabanaketa politikak hildako presoen senideez ez da oroitzen dokumentua. Txostenak ez ditu jasotzen, ezta ere, gatazkaren testuinguruan bizitza galdu zuten Jon Pagazaurtundua orozkoarra; Gotzon Landeta Amurrioko iheslaria (erbestean garatutako gaixotasunaren ondorioz hila); torturatuen kasuak, Bixente Malaxetxebarriarena  kasu…Memoria zati bat agerian. Beste bat ezkutuka.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa