[IRITZIA] Aukeran, euskaraz

Erabiltzailearen aurpegia Julen Pagazaurtundua González 2020ko urt. 20a, 07:00
Orozkoko ikasleak eskolara bidean. / Garazi Abrisketa

Iritsi da eguna. Jakin-minaren, zirrararen eta ezinegonaren arteko nahasketa. Haurra urduri eta gurasoak edo aitona-amonak are urduriago. Biek eskua elkarri helduta egin dituzte etxetik ikastetxeko atera arteko metroak.

Dena matrikula egin osteko hilabete luzeetan pentsatu bezala ateratzeko desioan: eskolara heldu, semea, alaba edo biloba agurtu eta, egun osoa inongo negar edo ezbeharrik gabe igaro ostean, bere bila itzuli. Ez dirudi horren konplexua.

Hala ere, bertara ailegatu bezain pronto jende arrotza nonahi, ume zein heldu. Hasierako urduritasuna, modu esponentzialean, indarra irabazten doa, bat-batean, mantala soinean duen maisu zein maistra bat hurbildu eta "Kaixo, egun on. Zer moduz?" botatzen dien arte. Eskola-ibilbideari hasiera eman dion esaldia.

Bertan lagunak (eta, zenbaitetan, etsaiak) egiten hasi eta, gutxika-gutxika, elkarrekin hazi. Eskola nahiz haurren mundua inguratzen duten hesiak gainditzen hezi.

Etengabe jauzika, baina inoiz jausi gabe. Helduak-edo izatera heldu garenok ezin ditugu ahaztu gure hainbat eta hainbat maisu-maistren izenak, tarteka-marteka, neska-mutilak, astakiloak, oso aztoratuta ibiltzen direla esango duten horienak.

Eskerrik asko, haiek (gurasoak edo senideak) erdaldunak izan arren, datorren ikasturtera begira, eredu euskaldunaren alde egin eta euren seme-alabei aukera hori eskaintzeagatik.

Amets Arzallusek 2013ko Bertsolaritza Txapelketa Nagusiko amaierako agurrean esandakoan oinarrituta, eskerrak eman nahi dizkiet haurrak ginela eta direla euskaraz erakutsi ziguten eta,

2020-2021 ikasturtean, Laudioko ikastetxeetan hasiko diren haurrei erakutsiko dieten guztiei. Aukeran, euskaraz nahiago dugulako.

Iritzia

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide