IRITZIA

Egonean

Egonean dauden bi:

- Entzun al duzu urliari gertaturikoa?

- Zeini?

- Duela aste gutxi batzuk okindegian hasi zenari.

- A!, bai. Zer du horrek, bada?

- Bertatik bota berri dute.

- Zer diostazu?! Bai, ala? Ez al zen iaioa ogia egiten?

- Bai bai, ofizioa ezagutzen zuen, baina orea lantzen hasi aurretik, ez omen zituen eskuak garbitzen, ez baitzekien nola; eta, dakizunez, okindegian oso oso zorrotzak dira higiene kontuei dagokienez.

- Oso oso, bai. Ogi ona egiteko ez da behar-beharrezkoa ganoraz xaboitzea, baina inork ez du gustuko ahora daramanean zikinik aurkitzea.

- Esan omen zioten, lan orduetatik kanpo, egun batzuk emango zizkiotela ikas eta, jardunari ekin baino lehen, horretarako ohitura har zezan.

- Eta berak, baietz, ezta?

- Berak, baietz.

- Baina bete ez, ezta?

- Erdizka-edo… 

- Eta kale gorrira, ezta?

- Horixe bera.

- Baliteke behar bezala ikasteko astirik izan ez izana.

- Baliteke… baina hori adostu bazuten… denbora, gogo edo abilezia falta… batek daki.

- …

- Bada, tirabirak badu besterik. Sandiak okindegikoen erabakiaren kontra egin du, eta urlia berriz kontratatzera derrigortzekotan omen da.

- Sandia? Hori…

- …bada nor. Dio eskuen garbiketa ez dela ahuntzaren gauerdiko eztula eta urlia nagusiegia dela orain horretan aritzeko eta egitera behartzea diskriminatzailea dela eta ahalegina ez dela aintzat hartu.

- Horrek dioena…

- …bada zer.

- Bai-edo… 

- Nago, uste baino lehen, lohia jaten hasiko garela.

- …

- Aizu!, eta ba al dakizu ezer kaleratu duten bitarteko funtzionarioaren eta Udalaren artekoaz?

- Zertaz?

- Ezertaz ez. Berdin dio.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide