2014 urtearen amaierarekin Chileko Andetatik euskal mendizaletasunak gertakari triste bat ekarri digu: mendizale batek bizitza galdu zuen Ojos del Salado mendi erraldoian.
Berri hauek zirrara sortzen dute gure barnean, heriotza beti delako mingarria baina maite dugun kirolean gertatzen denean kaltea onartezina da.
Agian oker nabil baina nire iritziz horrelako berriei komunikabide batzuk ematen dieten tratua ez da guztiz aproposa. Oihartzun haundiko berriak diren moduan batzutan asko eta asko hitz egiten da, ondo ez dakidan polemika punto bat edo morbo ikutu bat topatu nahian, onartzen dut ez direla komunikabide guztiak.
Alpinismoa eta goimendia konpromiso haundiko jarduerak dira kasu gehienetan, ondorioz, premiazkoa da mendizaleak kontutan hartzea egoera bakoitzean dauden arriskuak. Askotan oso zaila da zeren baldintza asko jokoan sartzen dira baina gure eskuetan dauden bitartean ahal den gehien gutxitzeko neurriak hartzea ezinbestekoa da.
Beraz horrelako egoeretan oso komenigarria izan daiteke adituek hausnarketa sakonak egitea bizitako esperientzietan oinarrituta eta etorkizunean halako gertaera larriak ez errepikatzeko praktika onak aditzera ematea. Komunikabideak lagun izan daitezke bide honetan, gugana heltzeko ahalmena daukatelako.