Grezian ume errefuxiatuekin jolasten igaro zuten lehen eguna Hesiheseko kideek

Erabiltzailearen aurpegia

Hesihes kooperatibako kideek atzo eman zuten bere lehen eguna Victoria Social Centerren, Atenasen. Begirale lanetan aritu ziren hainbat herrialdeko ume errefuxiatuekin.

Asteazkenean Greziara bidaiatu ostean, atzo hasi zuten boluntario lanak Hesihes kooperatibako kideek Victoria Social Centerren. Euren lehen egunean ume errefuxiatuekin jolasten aritu ziren, begirale lanak beteta.

Asmoa bazkaria prestatzen laguntzea bazen ere, norberaren araberako gaitasun eta gogoak aintzat hartuta lan egingo dute hemendik aurrera. Ondorioz, batzuk ludotekan egongo dira, eskulanak antolatzen, adibidez, eta besteak hizkuntza klaseak emango dituzte, edo irakasleak lagundu.

Errefuxiatuentzako zentroa 11:00etan irekitzen ditu ateak 16:00ak arte. Lan boluntarioan oinarrituta dago eta jendea joan eta etortzen da. Laudioarrak heldu baino lehen 15 bat lagun zeuden han. Laguntzaile gehienak kataluniarrak eta espainiarrak dira eta zuzendaritza kataluniar eta greziar banak osatzen dute.

Victoria Social Center, hamaika herri, hamaika ekintza

Julen Zubiete Aiaraldea Hedabideko kidea Hesiheseko gazteekin dago Grezian eta azaldu du errefuxiatuen zentroan jatorri ugariko erabiltzaileak daudela: "Gehienak Afganistangoak edota Siriakoak dira, baina badaude afrikarrak, eta Irakeko kurduak ere topatu ditugu."

Victoria Social Centerren jarduera bizia eta anitza dute, adin guztiak aintzat hartuta. Esaterako, ingelesa, alemaniarra, greziarra eta espainiarra irakasten dute, mailatan banaturik: "Oinarrizko klaseak daude, baina baita ere "First" titulua eskuratzeko".

Horrez gain, generoa ere da ardatza ekintzak banatzeko. "Emakumeentzako gela dago, eurek nahi dutena egin dezaten. Ileapaindegia ere badago emakumezkoentzat", azaldu du Zubietek.

Esan bezala, bertan lan egiten duen jende gehiena boluntarioa da, baina langile finko batzuk badaude ere. "Horietako baten bat errefuxiatu da", nabarmendu du Aiaraldea Hedabideko kideak.

Erredakzioa: Aitor Aspuru Saez
Argazkiak eta kronika: Julen Zubiete Iza

 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide