Anbiola, bazebilen historialari izen handiko aditu-ustekoen artean Vasco-cantabrismo esaten zioten teoria, erromatarren aurka jo eta su borrokatu ziren kantabro haiek euskoak zirela zioena, interan. Izan ere, bada, diotenez, Britainia Handiko museoan, 1190ko irakurgai bat, Division of kingdoms of Navarre and Spain delakoa, Nafarroako erreterria edo erresuma Urdializko uretaraino iristen zela omen dioena. Saurio edo Ason ibairaino, hain zuzen. Jakina da, halaber, Gartzia izeneko errege nafarrak bere emazte Stephaniari, 1040an doi-doi, ezkon-opari edo, hainbat herri eman ziona, eta mendebaldean, Aiarako Erretes eta Lanteorekin batera, Mena, Soba, Urdializ, Kolindres...besteak beste. Harez gero, urterik joan da, e!
Orain, berriz, Kantabriako partian, ez da besterik entzuten: txo, irekizu muga! Euskal Herria sartalderantz zabaltzen da, antza. Iparraldeko muga hertsirik izan arren, bortz axola, iparra aspaldi galdurik gabiltza eta. Nafarroarekikoa, beste behin, “frontera de malhechores” bilakatu zaigu. Baina, beti geratuko zaigu Laredo!
Honetara, ziur aski, bere aipamenak izango dira beste laurogei urtian, Kantabriako partian. Revilla lehendakariarenak, erran bage doa.