Bi urteko geldialdiaz gero, astindu beharra dugu, nonbait, eta mendira joko dugu, euskaldunek ohitura dugun eran. Argiak gora nahi eta gure mendietako gainak argiztatuko ditugu. Hasi Ganekogortan hurrengo larunbateko gauean hasiko gara, inguruko Arrankudiaga, Ugao, Arrigorriaga, Basauri, Alontsotegi, Barakaldo, Bilbo...eta abarretako lagunekin batera. Aiaraldekook Ermuko Santa Luziaren baseliza ondotik hasiko gara goiti.
Ganekogortakoa entrenamendu baino ez da. Izan ere, aurten bai, berriro Oletako Eguna ospatzeko dugu, ekainaren 5ean hain zuzen.
Handiena, berriz, Pirinioetan egin nahi duguna. Kataluniako adiskideekin batera, Euskal Herritik Kataluniaraino, mendirik gorenak, hegiz hegi, argiztatzeko asmoa dugu. Uztailaren 2an izanen da. Aiaraldekook Nafarroako Adi mendira igoko gara…“aurrean Baztan dadukazu, gibelean Erro alde, ezkerretarat Eugi herria, eskuin alderat Luzaide; zure guziak Naparroaren hegalen azpian daude” ziotson Xalbadorrek, eta zinez egia! Eta Urepeleko Artzainak ongi baino hobeki zioen bezala erraiteko, guk ere Adi menditik “goi ta beherik ez da enetzat, Naparro bat da bakarra” erranen dugu. Nafarroa Euskaldunen Estatu izan baitzen, eta izanen baita!
Ez zaigu hala ere ahantzi behar “saltus vasconum”-etik “ager vasconum”-era hedatu behar dugula gure argia. Egitekoa ez da makala, baina gure esku dago, guztion esku.
