Zeinen ederra den zu euskaraz entzutea! Eta, tamalez, zeinen gutxi entzuten den! Abenduaren 3an euskararen Nazioarteko eguna ospatu egiten dugu, 30 urtetik beherako pertsona gehienek euskaraz ulertzeko eta hitz egiteko gaitasuna duten arren, erabilera datuak ez dira hain politak. Hizkuntza modu holistiko batean landu behar da esparru guztietan, eskolan ikastearekin soilik ez genuke ezer egingo etxean lantzen ez bada. Eta etxean erabilita soilik ez genuke ezer egingo aisialdian edo teknologia berrietan erabiltzen ez bada.
Globalizazioak oro har ekarri du pantailetatik kontsumitzen den hori ez izatea euskaraz, gaur egun youtuberrak, influencerrak, tik-tok, marrazki bizidunak… gazteleraz edo ingelesez kontsumitzen dituzte haur eta gazteek, honek eragin handia duelarik haien hizkuntza ohituretan.
Egoera honen aurrean, zer egin? Euskara sustatzeko ikerketek bi gauza diote: derrigortasunik ez eta erabileraz kutsatu. Derrigortasunak hizkuntza gogaitzea ekar dezake, hizkuntzatik aldentzea, horregatik hizkuntza sustatzeko sariak eta zigorrak ez dira metodorik eraginkorrenak.
Hizkuntzaren erabilera norberaren hautu politiko bat da, baina hautu politiko hori txikitatik sustatu daiteke. Euskarak eremuak irabazten jarraitu behar du, eskola konkistatu zuen moduan, teknologia berriak konkistatu behar ditu orain, gehiago, gehiagotan eta gehiagorekin euskaraz egiteko.