aiaraldea.eus

Lanaren oparia

Erabiltzailearen aurpegia Koldo Iriarte   Iritzia

Aurtengo lau t’erdiko banakakoa asko gustatzen ari zait. Irujok eta Olaizolak asko sufritu dute finalera iristeko. Baina Saralegiri buruz mintzatuko naiz, Amezketako pelotari fina. 34 urterekin bizitzako lorpen handiena jaso du, aurtengo lau t’erdiko semifinaletan sartzea. Sorpresa handia izan da askorentzat. Bere kontratua  bukatzear egonagatik oso ondo prestatu du txapelketa. Gutxi batzuek espero zuten holakorik. Balmasedan Urrutikoetxearen kontra, partida konpletoa jokatu zuen; erraz irabaziz, dirua nabarmen bere aurka zegoenean. Hurrengoa Logroñoko Adarraga pilotalekuan jokatu zuen, Titin III. aren kontra. Errioxarraren azken txapelketa zen eta Ekaitzek kriston jipoia eman zion, final laurdenetarako txartela lortuz. Final laurdenetako ligaxkan, hiru partidu jolastu eta bi irabazi zituen; Iker Arretxe eta Mikel Idoate garaituz eta Oinatz Bengoetxearen kontra galduz. Hala, final erdietarako txartela eskuratu zuen. Final erdietan hezur gogor bat Amezketarrarentzat: Aimar Olaizola goizuetarra, sei final jokatu eta sei aldiz txapeldun, ia ezer ez! Baina goizuetarrak, latz sufritu behar izan zuen Ekaitzi irabazi ahal izateko. Partida Iruñeko Labriten izan  zen. Solairu guztiak amezketarrez beteta. Eta azkenean Aimarrek irabazi, 22-18. Hortxe zapuztu ziren Ekaitzen aukera guztiak finalean sartzeko. Hala ere, bere bizitzako lorpenik handiena ikusita denok espero dugu enpresak kontratua luzatzea. Horrela pilotazale guztiok gozatzen jarraituko dugu. Aupa Ekaitz, asko gustatu zaigu lau t’erdiko txapelketa zurekin!

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa