Aspalditik dagoen ahalegina Aiaraldera iritsi da. Saltoki kate handiek jai egunetan irekitzearen nahia langileen kontrako erasoa dela eurek ere jakin badakite. Langileen prekarizazioan sakontzen dute. Lana eta familia bateragarriak izateko atzerapauso larria da. Sektore hau guztiz feminizatua dago, beraz, emakumeak dira irekiera hauen ondorioak pairatzen dituzten langileak.
Bezerook, eta ondorioz, gizarteak ere eraso hau pairatzen dugu. Aisialdiaren kontrako erasoa da. Kontsumismo basatiaren izenean igande eta jai egunetan erosketak egiteko beharra sortu nahi dute.
Hori al da nahi dugun eredua? Saltoki handietan edo hiriburuetako hainbat kaleetan eman nahi dugu gure jai egun edo aisialdia, kontsumitzen? Existitzen ez den behar hori sortu nahi digute.
Sindikatuak, merkataritza elkarteak, erosle elkarteak... irekiera hauen kontra agertu diren arren, PNVk, Eusko Jaurlaritzatik, kontu hauetan Espainako legeak baino larriagoak diren lege berriak inposatu nahi ditu diruan eta turismoan oinarrituta. Norentzako dirua? Norentzako legeak? Hau da Euskal Herrirako nahi dugun eredua (eta turismoa...)?
Igande eta jai egunetan irekitzen duten saltoki hauetan ez dut erosiko, ez igandeetan ezta asteko edozein egunetan ere. Ez diet nire babesa emango. Guztion aisialdia defenda dezagun.