Ikastetxe baten irakasle, langile, ikasle eta ikasle ohiak batu dira proiektu baten inguruan, norberaren arte lanak erakusteko. Zer dute komunean? Aresketa Ikastolarekin duten edo izan duten harremana, besterik ez.
Ez bilatu erakusketa honetan diskurtsoa bideratzen duen haririk, ez baitago, adin ezberdinetako artistak ditugu, batzuk nerabezaroan, beste batzuk gaztaroan eta beste batzuk, bizitzaren udazkenean lehenengo urratsak ematen. Nor bere hamarkada eta esperientziaren seme-alaba, horrek dakarren aberastasunarekin.
Sormen lanek bestalde, gaur egungo artearen oinarrizko ezaugarriak betetzen dituzte, adierazteko hainbat forma etengabe bilatzen baitituzte: abstrakzioa, arte kontzeptuala, originaltasuna, esperimentazio artistikoa eta egilearen beraren aztarnak dira ezaugarri nagusiak.
Erakusketa honetan zera aurkituko dugu: naturari buruzko argazki bilduma, hiriko argazkiak, collage digital kontzeptualak, instalazio bat, perfomance baten bideo esperimentala, burdinezko eskultura bat; diseinuari dagokionez, maketak, kartelak, eta bestelako artikuluak, ilustrazio eta diseinu grafikoaren lanak, begirada berri bat zeramika lanei.
Eta zer esan gazteenek aurkeztu dituzten lanei buruz, egile ezagunak erreferentzia hartuta daude hainbat lan: Picassoren Gernika, Niki de Saint Phaleren nanak, XX. mendeko argazki ikoniko bitxiak egiteko plastikozko elementuz osaturik, beste lan batzuetan naturako elementuak eta etxeko gauza arruntak birziklatu dituzte zentzu berri baten bila. Alabaina, aurkeztutako lan guzti-guztietan egilearen distira nabarmentzen da.
Hortaz, zein da interesgarriena? Artista eta arte lan hauek batzen edo ezberdintzen dituena?
Aresketa Ikastolarekin izan duten harremanetik abiatuta, artea iparrorratz duen proiektu komunean aritu dira Miren Murgaren koordinatuta. Hori da batzen dituena, hain zuzen ere. Zorionak eman beharra dago ikastetxe batek plastikaren alde egin duen apustu eta agerpen nabariagatik.
Hori bezain interesgarria, erakusketan adierazten den aniztasuna, kontzeptuak adierazteko teknikak eta modu ezberdinak, berezko mezuak, beharrezko irudiak. Ezberdintasun hori ere ederra da. HAZIA LANDATUTA DAGO, orain lorezainak bezala, hazia ureztatu, zaindu besterik ez da egin behar fruituak ikusteko.
Erakusketa: ARTEAREN HAZIA
Tokia: “La Casona”ko erakusketa aretoa, Aldai 2, Amurrio
Egunak: apirilaren 18tik maiatzaren 4ra bitarte
Sarrera: doan