Joxemari Agirretxe, Porrotx pailazoa bezala ezagunagoa dena, arituko da hizlari aurten “Baloreetan hazi, hezi, bizi” gaia lantzen ari diren Laudio Ikastolaren XV. Hezkuntza Jardunaldi Irekien 2. Saioan. Hitzaldia maiatzaren 30ean, larunbata, Laudioko Kultura Etxean 10:30etik 12:30era burutuko da.
Sentitu, pentsatu, ekin... Joxemarirekin
Hitzaldiak “Sentitu, pentsatu, ekin… Joxemarirekin” izenburua izango du eta berton Pirritx, Porrotx eta Marimotots pailazo taldeak baloreak lantzeko bultzatu duen “sentitu, pentsatu, ekin” metodologiari buruzko hausnarketa partekatuko du Joxemarik bere pailazo, hezitzaile, euskaltzale eta guraso ikusmiratik, aldi berean bere ibilbide osoaren errepaso bat eskainiz. Horrez gain “Herri hezitzaile, eskola herritarra” dinamikaren partaide denez gero, ekimen honetan diharduten eragileak lantzen ari diren proposamenaren berri emango du.
Jardunaldia hezkuntza komunitateetan lanean ari diren kolektibo guztiei irekita dago, hezkuntza formalean zein ez formalean aritzen direnei, interesa duen herritar orori finean. Oraingo saioan guraso euskaldunei bereziki egokitutako eskaintza jorratu du Laudio Ikastolak.