Aukera baliatuta, gurasoei eta hezkuntzan interesatutako herritarrei zuzendutako hitzaldia irekia eskainiko du Jordi Musons-ek otsailaren 1ean, osteguna, Laudioko Kultura Etxeko Arraño gelan, 17:30ean. Haurtzaindegi zerbitzua izango dugu.
Aurkezpena
Hezkuntza esparruan eraldaketa ugari abiatzen ari da egun. Laudio Ikastolan, esaterako, konfiantzaren pedagogia edo EKI metodologia abiatu berri ditugu.
Beste ikastetxetako esperientzia berritzaileak ezagutzeko asmoz, Bartzelonako Escola Sadako-ko zuzendaria den Jordi Musons gonbidatu dugu bertoko esperientzia ezagutzeko.
Gurasoentzako hitzaldia
Otsailaren 1ean, osteguna, arratsaldeko 17:30ean, Laudioko Kultura Etxeko Arraño gelan izango dugu “Aldaketan hezi” hitzaldia eskaintzen. Haurtzaindegi zerbitzua izango dugu.
Escola Sadako
Jordi Musons Escola Sadako-ko Zuzendaria da. Eskola honek Haur Hezkuntza, Lehen Hezkuntza eta Bigarren Hezkuntza eskaintzen duen ikastetxe kontzertatua da, eta 700 bat ikasle ditu.
Orain dela hamar bat urte aldaketa baten beharra ikusi zuten eta berrikuntza pedagogikoarekin hasi ziren. Gaur egun, Bartzelona inguruko ikastetxe erreferenteetariko bat bihurtu da. Eskola honek “change maker “ filosofiarekin lanean dihardu. Pertsonetan oinarritutako irakaskuntza aktiboa bilatzen du, hau da, ez du bere jarduera edukietan bakarrik oinarritzen.
Ikasleek ez dute mahai indibidualik, maila desberdineko ikasleek batera ikasten dute eta, gainera, hau guztia, ikaskidetzan egiten dute. Ikasleek ikasketa zerbitzuen proiektuak egiten dituzte eta bileretan erabakiak hartzen dituzte. Hau dana liburu didaktikoak erabili gabe egiten dute.