Bizi dugun egoera epidemiologikoa kontuan hartuta, eta Eguberrien kariaz aire zabalean zein esparru itxietan antolatuak dauden ekitaldiei begira, Laudio Udalak herritarren erantzukizuna eta jardun ona jarri ditu ekitaldiok ondo irteteko ardatz legez. Ildo horretatik, musukoa behar bezala eta une oro erabiltzeak duen garrantzia gogoratu dute ostera ere Laudioko Udalbatzaren ordezkariek, bereziki, segurtasun tartea hartzea ezinezko egiten duten egoeretan. Esparru eta leku itxietan egingo diren ekitaldietan, derrigorrezkoa izango da musukoa behar bezala ipintzea, eta, gainera, Covid pasaportea aurkezteko eskatuko da. 6 urtez beherakoen kasuan, eta derrigorrezkoa ez den arren, leku itxietan musukoa erabiltzea gomendatu da.
Covid ziurtagiria eskuratzeko zailtasunak dituzten pertsonek udaletxeko Herritarrentzako Arreta Zerbitzura (HAZ-ra) joan ahalko dute, osasun-txartela (OTI-a) eta sakelako telefonoa eramanda, dokumentua eskuratzeko eman behar den gako unipertsonala horren bidez emateko. Aldi berean jende gehiegi pilatu ez dadin, joan aurretik hitzordua eskatzea gomendatzen da.
Hain zuzen ere, kiroldegian antolatu diren ikuskizunetan jende-pilaketarik eta ilararik ez gertatzeko, Udalak web-aplikazio bat jarri du herritarren esku, lekuak ordu-tarteen arabera (baina zenbakitu barik) erreserbatzeko aukera izan dezaten. Horri esker, lekuak erreserbatzeko eta modu ordenatuan eta gutxika sartzeko aukera egongo da, eta pilaketak ekiditeko modua izango dugu. Web-aplikazioa zapatu honetatik aurrera egongo da herritarren esku, hau da, abenduaren 25etik aurrera.
Erreserba egiteko, pertsona interesdunek bertaratuko direnen izenak, telefonozenbakiak eta konfirmazio-mezua jasotzeko helbide elektroniko bat adierazi beharko dute. Pertsona bakoitzak 4 leku baino ezingo du erreserbatu. Horrez gain, zer ordu-tartetan joan nahi den ere adierazi beharko dute:
• Kantu Kolore ikuskizunaren kasuan: 17.00 / 17.20 / 17.40. Erreserbak abenduaren 25etik aurrera egin ahalko dira, eta abenduaren 28ko 16:00ak arte.
• 6ID taldearen kontzertuaren kasuan: : 19.00 / 19.20 / 19.40. Erreserbak abenduaren 28ko 18:00etatik aurrera egin ahalko dira, eta abenduaren 30eko 18:00ak arte.
• Korrontzi taldearen kontzertuaren kasuan: 19.00 / 19.20 / 19.40.
Erreserbak abenduaren 30eko 18:00etatik aurrera egin ahalko dira, eta urtarrilaren 2ko 18:00ak arte.
Dena arinago egiteko eta ilararik ez sortzeko, Udalak herritarrei eskatzen die sartzeko unean erreserben mezu elektronikoak eta Covid ziurtagiriak prest izateko, eta erreserbatu duten ordu zehatzean bertaratzeko, ez lehenago, ez beranduago.
Laudioarron segurtasuna bermatzeko, bi ate erabiliko dira kiroldegian sartzeko.