Udalak jardunaldi irekia antolatu du otsailaren 8an, asteartea, 17:00etan, herritarrentzat, elkarteentzat, ostalarientzat eta gainerako interesdunentzat, Espazio Publikoaren Erabilera Arautzeko Ordenantzaren proiektua osatzeko lan-prozesuaren oinarriak aurkezteko. Laudioko Udala 2020tik ari da arau horretan lanean, eta espazio publikoaren okupazioarekin erlazionatutako hainbat alderdi arautuko ditu, hala nola terrazak, kultura- eta musika-ekintzak, ibiak, etab.
Jardunaldi horrekin, beraz, hasiera emango zaio Osoko Bilkura osatzen duten talde politikoak eta herritarrak, taldeak eta elkarteak, oro har, hainbat bideren bitartez inplikatuko dituen lan-prozesuari.
Jardunaldiaren ondoren, lehen zirriborrorako ekarpenak jasotzeko aldia irekiko da, eta udalaren webgunean argitaratuko da. Helburua Laudioko udalerrian espazio publikoaren erabilera arautzeko ildo nagusiak ahalik eta adostasun handienarekin biltzea eta definitzea da, erabilera desberdinen arteko bizikidetza bilatuz. Saioa Kultur Etxeko Arraño Aretoan izango da.