Laudioko Udalak datozen asteetan hasiko ditu, esleipen-prozedura ebatzi ondoren, adinekoen Sant Roketzar zentro soziokulturala egokitzeko eta handitzeko lanak. Laudioko Udalak 69.908,22 euroan atera ditu lizitaziora azpiegitura horretan egin beharreko lanak, eta obra hasi eta hiru hilabetera amaituko direla aurreikusten da.
Udal Administrazioak merkataritza-lokal izandakoa erosi berri du Karmengo Ama 22ko eraikineko beheko solairuan, erretiratuen zentroko bi lokalei gehitzeko. 80 m2 inguruko lokala da. Garai batean burdindegi bat izan zuen eta urte batzuetan itxita egon da, erabilera ezagunik gabe. Jarduera, barruko eta kanpoko akaberak guztiz berritzean datza, modu eroso eta seguruan erabiltzeko beharrezkoak diren instalazio guztiak egokitzeko. Izan ere, bi espazioak zuzenean komunikatzeko ate bat egingo da.
Fatxadak erretiratuen lokalaren egungo estetikari eutsiko dion arren, Udalak atari bat eraikiko du bertan dagoen atean, ireki aurretik espazio publikoa inbaditzea saihesteko. Ate horren neurriak handitu egingo dira, indarrean dauden irisgarritasun-araudiak bete ahal izateko. Bestalde, hego-mendebaldeko fatxadan lau bao berri irekitzea aurreikusi da, lokalari argitasun eta aireztapen handiagoa emateko.
Lokalaren instalazio elektrikoa ere osorik berrituko da, eta erradiadore berriak gehituko dira.