Datozen egunetan Laudioko Udalak premiaz lizitatuko du Zumalakarregiko igogailu panoramikoaren konponketa. Azaroan, igogailuan izandako ekintza bandalikoek barruko ateak, barruko eta kanpoko beiratea eta kabinako operadorea kaltetu zituzten. Baina urtarrilean horrelako ekintzak errepikatu ziren, azpiegituraren kanpoko ateak kaltetuta utziz. Laudioko Udala hainbat aldiz bildu zen zerbitzuaz arduratzen den Iza Ascensores enpresarekin, eragindako kalteak aztertzeko eta ahalik eta azkarren jarduteko. Azkenik, otsailean, zerbitzuaren esleipena duen enpresak birjartzeko material guztiak bildu zituenean, egituran antzemandako beste kalte handiago batzuen berri eman zion Udal-administrazioari. Korrosioaren ondorioz, hainbat solairutako eskailera buruen markoak oso hondatuta zeuden, eta horrek segurtasun arazo larria zekarren.
Egin beharreko lanetarako behar zen zenbatekoa kontuan izanda, ezinezkoa izan da azpiegitura zuzeneko kontratazio bidez konpontzea. Gauzak horrela, eta nahi baino gehiago luzatu den egoerari erantzuna emateko, Udalak Zumalakarregiko igogailuko elementu kaltetuak (ateak, beirak, kabinako operadorea, kabinako zorua eta beste erremate batzuk) konpontzeko eta hornitzeko lizitazioa egingo du datorren astean. Konponketa-lanetarako aurrekontua 35.000 eurokoa izango da gehienez. Eta enpresek proposamenak aurkezteko izango duten gehieneko epea 10 egun baliodunekoa izango da, iragarkia organo kontratatzailearen profilean argitaratu eta hurrengo egunetik aurrera.
Era berean, kontratua gauzatzeko, hau da, hornidura eta instalazioa egiteko, gehieneko epea hamabost astekoa izango da. Epe hori murriztea irizpide ebaluagarria izango da esleipenerako. “Epeak ahalik eta gehien murriztea espero dugu, eta igogailua lehenbailehen martxan jartzea, gure bizilagunei zerbitzua emateko. Barkamena eskatu nahi dugu prozesu honek guztiak herritarrei eragin dizkien eragozpenengatik”, adierazi du Ander Añibarro Laudioko alkateak.